भरतपुर, २४ भदौ
नेपाल पत्रकार महासंघले ‘नेपालको संविधानको परिमार्जित विधेयक–२०७२’ को स्वतन्त्रताको हकसम्बन्धी विभिन्न धाराप्रति गम्भीर असहमति प्रकट गर्दै दवावमूलक आन्दोलन सुरु गरेको छ । संशोधन प्रस्ताव संविधानसभामा दर्ता भइसकेको अवस्थामा त्यसको सुनुवाई गरी संशोधनमा दबाब दिन घोषणा गरेको दबाबमूलक विरोधका कार्यक्रम अन्तर्गत आज बिहीबार फेसबुक÷ट्वीटरलगायत सामाजिक सञ्जाल र एसएमएसमार्फत महासंघले नारासहितको अभियान सञ्चालन गरेको हो ।
महासंघले आज बिहीबार मुलुकभर छरिएका आफ्ना सबै सदस्यहरूमार्फत विहान ११ः०० बजे एकैसाथ ट्वीटर÷फेसबुकलगायत सामाजिक सञ्जालमा ‘प्रतिबन्धात्मक व्यवस्था संशोधन गरौं, संविधानमा प्रेस स्वतन्त्रताको ग्यारेन्टी गराऔं । –नेपाल पत्रकार महासंघ’ भन्ने स्ट्याटस पोष्ट गरेको थियो । साथै आ–आफ्नो क्षेत्रका सभासदहरूलाई सोही व्यहोराको मोबाइल सन्देश एसएमएसमार्फत पठाएर महासंघले दबाब दिएको छ ।
केन्द्रीय कार्यक्रमलाई चितवन शाखाले पनि समर्थन गरी सामाजिक सञ्जालमार्फत स्ट्याटस पोष्ट गर्नुका साथै चितवनबाट संविधानसभामा प्रतिनिधित्व गर्ने सभासद्हरुलाई सन्देश पठाइएको शाखा अध्यक्ष हरिप्रसाद पोखरेलले जानकारी दिए ।
महासंघका अध्यक्ष डा. महेन्द्र विष्टले सो सन्देश महासंघको वेबसाइट www.fnjnepal.org र आफ्नो फेसबुक स्ट्याटस पोष्ट गरी प्रारम्भ गरेका थिए ।
यसैबीच शुक्रबार विहान ११ः०० बजे सोही विषयमा सार्वजनिक ध्यानाकर्षण गर्न काठमाडौंको बबरमहलमा महासंघको आयोजनामा खवरदारीसभा गर्ने कार्यक्रम रहेको छ । उक्त कार्यक्रममा सक्रिय सहभागी हुन महासंघ सञ्चार सम्वद्ध सबै संघसंस्था, पत्रकार तथा प्रेस तथा अभिव्यक्ति स्वतन्त्रता पक्षधर सवैमा हार्दिक आहृवान गरेको छ ।